Maduro & Curiel’s Bank ta rekonosé importansia di hóbennan den negoshi, den tur sentido di palabra.

Paisnan rònt mundu ta konfrontando e reto di enbehesimentu, hasiendo importansia di hende yòn den negoshi aun mas evidente. Nos por siña hopi for di otro generashonnan ku tin eksperensia amplio den diferente segmento di negoshi. Sinembargo, pa manehá un negoshi eksitoso, un dósis grandi di entusiasmo i perseveransia tambe ta rekerí, loke generalmente ta karakterístikanan ku ta haña den hopi hóben. Pa sobrebibí e temporada finansiero pisá akí, negoshinan tin mester di un perspektiva nobo i e hóbennan por kontribuí aktivamente na esaki komo ku mayoria di nan no tin miedu di move frontera i saka algu for di nada.

MCB ta orguyoso di por bisa ku nos ta rekonosé e potensial di hóbennan den negoshi den tur sentido di palabra. Esaki ta reflehá no solamente den nos maneho interno, pero tambe den e manera ku nos ta atendé ku nos klientenan (eksterno). Pa kontribuí ku desaroyo di e empleadonan yòn MCB a introdusí na yüli 2008 “MCB Young Professionals” (MCB YP), ku ta un grupo informal ku ta konsistí di empleadonan di MCB te ku 35 aña di edat, ku tin un estudio mínimo di Bachelor. MCB YP a wòrdu introdusí pa proveé e profeshonalnan yòn den MCB ku e hèrmèntnan, eksperensia, ret di kontakto i abilidatnan nesesario pa nan por desaroyá i bira lidernan den futuro di MCB i di nos komunidat. MCB YP ta aktivo den MCB, hasiendo proposishon tokante kon mehorá e proseso i servisionan di Banko, pero tambe tin e meta pa kompartí nan konosementu ku komunidat. En konekshon ku esaki MCB YP a organisá na yüni 2009 e seminario “Biba kómodo: Hasi mas ku ménos”, kual tabata un éksito rotundo i e intenshon ta pa sigui organisá aktividatnan (edukashonal) similar pa komunidat.

Ademas, MCB ta orguyoso tambe di menshoná ku nos tin hopi kliente hoben ku ta negoshante eksitoso. Nos departamento di Empresa Chikí (Small Business), ku tambe ta konsistí di profeshonalnan yòn, ta mas ku dispuesto pa asistí e negoshantenan yòn den nan trayektoria eksitante pa éksito. E klientenan den e artíkulo akí ta djis un muestra di algun di nos negoshantenan yòn eksitoso, pero tin hopi mas. Esaki ta proba ku Kòrsou tin sufisiente hende yòn ku tin potensial pa yuda desaroyá nos dushi isla, tantu sosial komo ekonómikamente.

Nos ta hopi konsiente ku pa kuminsá un negoshi i pa sosten’é, spesialmente na kuminsamentu, ta un reto i en general hóbennan por enkontrá difikultat pa hasi nan plannan bira realidat. Sinembargo, ku e aserkamentu korekto, guia i sosten, negoshantenan yòn por bira eksitoso.

E mensahe aki ta bai pa tur hoben: “Si bo tin e chispa di empresario den bo òf kisas bo ta pensa di ta bo mes doño di trabou, bo mester sigui bo soñonan definitivamente”. Kuminsá ku bo propio negoshi komo un hóben ta un opshon pa un karera realisabel. Mas ku klaro ku e fase inisial lo no ta fásil i lo rekerí bo máksimo esfuerso, determinashon i kreatividat, pero ku e aktitut korekto i e sosten profeshonal adekuá, bo por alkans’é. E departamento di Empres Chikí di MCB ta konsistí di profeshonalnan yòn i eksperensiá ku no solamente lo ta dispuesto pa yudabo ku bo nesesidatnan finansiero, pero ku tambe por dunabo e sosten nesesario, guia i konseho. Ademas, nos tin un foyeto hopi interesante disponibel titulá: “BoNegoshi”, ku ta un hèrmènt balioso pa yuda empresarionan pensa riba faktornan krítiko pa kuminsá ku nan negoshi.

E departamento di Empresa Chikí di Maduro & Curiel’s Bank semper ta hasi su máksimo esfuerso pa su klientenan i ta bai e “extra mile” pabo!

to top