Komponentenan interno pa éksito

Miéntras ta importante pa tin sirkunstansianan makroekonómiko ku ta favorabel pa negoshi, empresarionan chikí mester asumí responsabilidat pa nan propio éksito. Tin vários ingrediente klave pa bida largu i prosperidat ku lidernan tin den nan mes man:

  • Kreatividat personal, abilidat pa adaptá i independensia
  • Abilidat pa distinguí entre un idea i un oportunidat
  • Maneho optimal di rekurso
  • Astusia den maneho di hende
  • Maneho kouteloso di plaka
  • Komprendé ki ora i kon pa pone kompania krese
  • Perseveransia ora konfrontá fayo
  • Un sistema aktivo di sosten i
  • Modelonan inspirador

Pa motibu di tempu lo mi enfoká kòrtiku asina riba kuater faktor so.

1) IDEA VERSUS OPORTUNIDAT

E promé faktor ta e abilidat pa distinguí entre un idea i un oportunidat. Hopi empresa chikí ta floresé pa un temporada i despues nan ta muri tempran, simplemente pasobra miéntras e negoshi tabata parse un bon idea, un oportunidat ta muchu mas. Esaki ta enserá komprendementu di demanda di merkado, sirkunstansianan ekonómiko di e momentu, rísikonan ku tin envolví, barera ku ta stroba entrada, e ambiente kompetitivo i muchu mas.

Un plan di negoshi minusioso tin hopi di e informashonnan aki den dje; sin embargo hopi di nos operadónan di empresa chikí i mediano no ta inkliná ni tin e konosementu eksperto pa traha un bon plan di negoshi. Tin biaha esaki ta resultá den desapunto ora nan pidi un fiansa pa negoshi i, despues ku nos a analisá e perspektivanan di e negoshi, nos mustra ku e negoshi no ta faktibel den e forma ku e ta na e momentu ei.

Nos ta komprendé ku empresarionan ta hende ku ta tuma rísiko, pero e empresarionan mas eksitoso na mundu ta tuma rísiko kalkulá a base di investigashon bon fundá.

to top

2) MANEHO KOUTELOSO DI PLAKA

Papiando di e tópiko di maneho kouteloso di plaka nan ta bisa ku pa negoshi chikí i mediano plaka ta rei: un bon fluho di plaka kèsh ta esensial pa tene e negoshi den operashon i pone un base pa kresementu. Sin embargo, algun di nos empresarionan chikí ta kometé e eror di gasta ganashi ku nan buki ta mustra promé ku e ganashi bira realidat i ta bin haña nan mes den un posishon ku tiki fondo. Otronan ta mara muchu fondo den inventario i despues nan ta haña nan mes forsá pa hasi fiansa kontra gastu altu pa kumpli ku nan nesesidatnan di kapital operashonal. Un otro eror komun ta mal maneho di kuentanan di debedó i kreditornan, poniendo ku e negoshi ta saka mas plaka ku e ta kobra.

Tur e senarionan aki por resultá den un krísis di fluho di kèsh i morto prematuro di e kompania. P’esei operadónan di empresanan chikí i mediano mester komprendé i práktika koutela den maneho di fluho di kèsh, di manera ku nan por mantené un posishon di kèsh sano pa fomentá e negoshi.

to top

3) SA E MOMENTU PA KRESE

E di tres punto di enfoke ta e abilidat pa komprendé ki ora i kon pa pone un kompania krese. E eror komun ku hopi di nos empresarionan chikí i mediano ta hasi, ta trata di pone e negoshi krese promé ku e ta kla pa esei i sin hasi uso di e benefisionan di bon investigashon. Ta importante pa pone e kompania krese pa logra prosperidat, pero mester kumpli ku vários kondishon pa hasi esei ku éksito.

Eseinan ta enserá finansiamentu adekuá pa e ekspanshon, un bon merkado, rekurso físiko adekuá, i abilidat di maneho apropiá. E último punto aki partikularmente ta un doló di kabes pa empresarionan chikí i mediano, komo hopi di nan no ta realisá kompletamente ki konosementu eksperto adishonal tin mester pa abri un mas lugá di negoshi òf bini ku un liña nobo di negoshi. Si pa motibu di e éksito di nan operashon di e momentu ei nan ánimo ta asina altu ku nan ta kore ekspandé negoshi sin pensa drechi, e konsekuensianan por ta desastroso.

to top

4) MANEHO DI HENDE

Maneho di hende ta espesialmente importante pa negoshi chikí, komo no semper e papel ku kada hende ta desempeñá ta definí klaramente. Hopi biaha ta eksigí pa hende traha duru, hasi trabou ku no ta a base di un deskripshon di funshon i tarea múltiple. Masha hopi biaha sa sosodé ku e empresario chikí no por paga e tarifa na vigor riba merkado.

Si esaki ta e kaso, ta karisma i liderato so ta pone ku e empleadonan ta kuida e negoshi komo si fuera e ta di nan mes. Esei ta eksigí liderato madurá ku tin firmesa, por demostrá kompashon i inspirá hende, di manera ku e empleadonan por kompartí e vishon.

KONKLUSHON

Resumiendo, esnan ku ta interesá pa bira doño di empresa chikí i mediano, mester komprendé ku un negoshi chikí no ta un kos ku bo ta logra den un, dos, tres: ta eksigí tempu i trabou duru pa pone un negoshi krese. Prosperidat i bida largu no ta kos ku bo ta logra sin sakrifisio i privashon. Doñonan di empresa chikí mester siña ‘lucha’. Ta solamente si nos inkalkulá e espíritu di sobrebibensia aki i perkurá pa ambiente, training i edukashon optimal, nos lo realisá e kresementu i prosperidat nesesario pa hiba nos pais dilanti.

to top