E tendensia pa biba di un manera mas bèrdè a laga su frutanan rònt mundu.

Kiko ta Fiansa Konsiente?

Esaki ta un fiansa ku Maduro & Curiel's Bank ta duna abo komo komersiante e oportunidat pa hasi invershonnan ku ta kontribuí na konservashon i adelanto di nos medio ambiente i ku alabes lo laga bo negoshi bira mas efisiente pa asina yuda bo hasi mas ganashi. Fiansa Konsiente tin kondishonnan sumamente atraktivo pa motivá abo ku ta hasi negoshi ta mas konsiente di e importansia di nos medio ambiente.

Di e forma aki tambe Maduro & Curiel's Bank ta demonstrá ku nos ta e Banko bèrdè di bèrdè mes i nos ta spera ku nos Fiansa Konsiente lo por enkurashá tur kompania pa djòin nos den e bon kousa aki.

Invershonnan ku por wòrdu finansiá ku Fiansa Konsiente:

A. Redusí pèrdida

• Invershonnan pa buska medida pa redusí e uzo di papel pa komunikashon interno i èksterno. (p.e papel di printer, toner, espasio ku ta wòrdu uzá, èts.)
• Invershonnan pa enkurashá resiklahe (mashin pa traha produktonan ku produktonan uzá) por ehèmpel mashin pa kolektá papel pa reuzá i resiklá bleki, glas i karton.

B. Konservá rekursonan

Tin hopi aparato i sistema ku ta traha di un forma efisiente ku por konservá rekursonan. Por ehèmpel, kranchi i tualèt ku ta spar awa, èrko ku ta gasta ménos koriente, sènsòr ku ta paga i sende lus, sistema di irigashon ku ta gasta tiki awa. Sistema pa traha energia renovabel generá pa solo, bientu i awa (basta ku e sistema no ta kontradesí e reglanan di Aqualectra).

Invershonnan den teknologia ku ta traha edifisionan i negoshinan ku ta ekonomisá energia.

C. Uza produktonan ku ta ekológikamente sano

Kompra di produktonan ku tin influensia riba nos medio ambiente manera material ku no ta venenu i produktonan resiklá òf biológiko.
Kompra di aparatonan ku ta ekonómiko.

Benefisionan

• Kontribushon aktivamente di bo negoshi na bienestar di nos medio ambiente
• Interes hopi atraktivo di 7% pa bo negoshi aportá na konservashon di nos medio ambiente
• Redukshon di bo gastunan operashonal dor di mehorashon di efisiensia
• Posibilidat pa hasi invershonnan bèrdè ku te awor a wòrdu posponé dor di falta di fondo
• Oportunidat pa inkluí gastunan di konseho i konsultá ku un eksperto di medio ambiente den bo Fiansa Konsiente
• Opshon pa hasi uzo di un periodo di grasia di 3 luna durante kua no mester kumpli ku pago di e fiansa. Esaki ta duna Bo e oportunidat di dediká mas atenshon na benefisio di Bo negoshi i nos medio ambiente
• 25% redukshon riba gastunan atministrativo di e fiansa
• Hopi Fun Miles pa yuda'bo spar i risibí benifisio na diferente lokalidat na Antias i Aruba
• Risibí un tarheta di krédito Kompa Leon Green ku opshon pa 1% kèsh bèk donashon na organisashon di medio ambiente

Kondishonnan di Fiansa Konsiente

• Invershonnan na benefisio di medio ambiente
• Montante te na un máksimo di NAf 250.000,=
• Término pa paga bèk den máksimo 7 aña
• Fiansa Konsiente no ta aplikabel pa refinansiamentu di fiansanan eksistente

Teps

• No laga bo kòmpiuter, printer, òf otro aparatonan riba "standby" si bo no ta uzando nan.
• No laga charger den koriente ora ku bo no ta kargando un aparato.
• Uza trapi na ofisina en bes di left. Subi trapi ta bon pa bo salú i mas poko uza left, mas ta spar riba gastu di energia.
• Evitá di uza lus kaminda no mester. Por ehèmpel pone bo eskritorio pa probechá lus di dia.
• Paga tur lus ora bo sali for di un kamber òf otro espasio.
• Ekipá bo negoshi ku peranan di lus ku ta uza ménos elektrisidat (compact fluorescent light bulb/ CFLs).

Team di eksperto

Kontakto