MCB a hasi donashon na 5 organisashon ku meta ambiental for di fondo ku a keda rekoudá na entrada di “Auto Show2008”

Maduro & Curiel's Bank den nos afán pa aportá di bèrdè mes na un mihó medio ambiente i trata na konsientisá un i tur pa tambe djòin pa huntu sigui kuida nos medio ambiente i nos planeta, a hasi entrega di donashon na 5 instansia/organisashon ku meta ambiental.

Kenneth Isidora, direktor di Departamentu di Fiansa Personal i Hipotek a bisa durante entrega di e donashon: “Tur aña di nobo nos ta sòru pa tur loke nos generá na entrada durante Auto Show nos duna esaki bèk na komunidat. E aña aki nos a hasié un poko diferente. Pa sigui duna un aporte di bèrdè mes, nos a duna instansianan i organisashonnan ku meta ambiental e oportunidat pa entregá nan ideanan/proyekto ku nan ke implementá pa yuda kuida nos medio ambiente. Loke nos a generá e aña aki na Auto Show a keda repartí entre e mihó 5 proyektonan ku meta ambiental ku a kumpli ku kriterionan di un kuerpo di hurado imparsial. Reakshonnan tabata hopi, pero lamentablemente ta 5 instansia/organisashon so e pènel di hurado por a skohe di moda ku esakinan por risibí un montante ku por yuda nan alomenos start ku nan proyektonan”.

Instansianan/organisashonnan ku meta ambiental ku a risibí donashon ta :

Fundashon Tuma mi Man ku nan proyekto “1,2,3,4 papier van oud papier”,

JCI IOBA Curaçao ku nan proyekto “ Watertool kit”, Fundashon Instituto Splikami ku nan proyekto “Splikawa”, Uniek Curacao ku nan proyekto “ Projectaanvraag gebied Fontein” i Nahambri ku nan proyekto “Re-plantá bario di Brievengat”

Kenneth Isidora a sigui bisa :“No ta 5 proyekto so tabata bale la pena, ta tur tabata proyektonan interesante. A base di e reakshonnan ku nos a risibí nos Banko a realisá ku nos a djòin un grupo grandi ku ta aportando di bèrdè mes. Abo tambe ta djòin ?”