Donashon di MCB na Programa pa Desaroyo Duradero di Fuik

E Programa pa Desaroyo Duradero di Fuik di kua “Fuik Community Garden Program” ta e punto di lansa, a haña sosten finansiero di Maduro & Curiel's Bank pa koba un pos i pa kumpra i instalá un mulina di bientu pa e promé “Hòfi di Bario”.

E Programa pa Desaroyo Duradero di Fuik ta basá riba un filosofia di Nashonnan Uní ku tin komo vishón: Kuido di medio ambiente, bon kalidat di bida pa tur hende i kresementu ekonómiko responsabel. Un di e aspektonan fundamental di Desaroyo Duradero ta kumplimentu ku bo mes nesesidatnan mas tantu posibel, i garantia di kuminda ta un di e áreanan krítiko ku Desaroyo Duradero ta enfoká riba dje. Komo ta bai kuminsá un proyekto asina pa agrikultura, “Hòfi di Bario di Fuik”, a limpia algun área i a drecha algun dam pa wanta i warda awa di yobe, ku koperashon di LVV, esta servisio insular di Agrikultura, Krio di Bestia i Peska.

Maduro & Curiel's Bank, nos “Sosio Bèrdè” a hasi un donashon di NAf. 9.250,- pa boramentu di un pos, i kompra i instalashon di un mulina di bientu pa nos por kuminsá ku nos promé “Hòfi di Bario”, kaminda hendenan di e bario por planta pa kumpli ku nan mes nesesidatnan i tambe partisipá na un programa koperativo pa produsí bèrdura i fruta.

Gino Valeriaan, Relashonista Públiko di Bo Banko Amigu a deklará ku Maduro & Curiel's Bank no a duda ningun momentu pa yuda e “Fuik Community Garden Program” : “Nos no a duda ningun momentu pa yuda nan. Nos Banko ta hiba e mesun pensamentu ku “Fuik Community Garden Program”, nos tambe ke yuda di bèrdè mes. E proyekto aki ta kuadra presis ku e filosofia di nos Banko tambe, yuda konsientisá nos mes i nos komunidat di e importansia di nos medio ambiente i pa alsa kalidat di bida. Nos ta masha orguyoso di por a aportá na e proyekto masha bunita aki di “Fuik Community Garden Program”.

E donashon di Bo Banko Amigu aki ta trese oportunidatnan na alkanse di komunidat di Fuik pa implementá un programa kaminda tantu grandinan komo hóbennan por bini huntu pa siña kos nobo i siña traha huntu pa lanta nan kalidat di bida, stimulá aktividat ekonómiko i drecha nan situashon di salú i ekonómiko, praktikando “Kultivá loke bo ta kome, i kome loke bo ta kultivá”. Nos ke yega na relashonnan di koperashon den nos komunidat pa realisá e programa aki; p’esei nos ta spera ku mundu komersial lo sigui e ehèmpel di Maduro & Curiel’s Bank ku nan sosten. Un biaha mas nos ke gradisí nos sosio Maduro & Curiel's Bank pa e regalo valioso na komunidat di Fuik, masha danki!