Dia Internashonal di Mama Tera (Earthday)
Djamars dia 22 di aprel Dia internashonal di Mama Tera (Earthday), Maduro & Curiel's Bank a sigui duna un aporte di bèrdè mes. Riba e fecha aki Bo Banko Amigu a bishitá vários skol básiko ku ta spar fielmente ku Lito i a repartí paki di simia di kònkòmber òf promentòn pa tur mucha. Tambe e skolnan aki a haña 2 tarea : 1) Kada klas mester a planta nan simianan di kònkòmber i promentòn i despues di 1 luna i mei Bo Banko Amigu a pasa tira un bista kon grandi e simianan a bira. 2) Kada skol mester a presentá nan idea kon nan skol lo aportá di bèrdè mes pa yuda kuida nos medio ambiente.
Bo Banko Amigu i su huradonan a premiá e tres skolnan ku a kuida nan simianan mas mihó i tambe a bini ku e mihó idea kon nan skol lo bai aportá di bèrdè na nos medio ambiente.
Riba e fecha di Mama Tera tambe e popular programa di TeleCuracao Mòru Bondia a keda transmití bibu i direkto kuminsando mitar di shete di mainta for di e brènch di Maduro & Curiel's Bank na Plasa Jojo Correa. E presentadó di Mòru Bondia, sra. Aileen Looman a entrevistá vários persona i organisashon ku tin di haber ku nos medio ambiente.
Riba e dia spesial aki tambe Bo Banko Amigu a regalá tur kliente ku a hasi un transakshon personal den kualke un di e 15 brènchnan, un paki di simia di kònkòmber òf promentòn. Ku e inisiativa aki Maduro & Curiel's Bank a duna un aporte pa enkurashá nos klientenan pa nan tambe kuminsá planta pa mayan nos yunan por disfrutá di un Kòrsou bèrdè di bèrdè mes.
Esakinan ta otro muestra ku Bo Banko Amigu ke aportá di bèrdè mes pa un mihó medio ambiente, un mihó Kòrsou i un mihó Mundu. Bo tambe ta djòin?
