MCB ta inisiá proseso fásil i grátis pa remplasá tarheta di débito i krédito personal i di negoshi ku ta deteriorá

Willemstad- Maduro & Curiel’s Bank ta inisiá un proseso fásil i grátis pa remplasá tur tarheta di débito i krédito personal i di negoshi ku ta deteriorá, pa klientenan di MCB Curaçao.

E kalidat di e tarhetanan ku nos a distribuí, lamentablemente no ta kumpli ku loke nos klientenan ta spera di nos. Nos ta den kòmbersashon ku fábrika tokante esaki. Nos ta pidi nos diskulpa pa e inkumbiniensia ku esaki a trese pa nos klientenan i ta spera ku e proseso rápido di remplaso di e tarheta deteriorá ta eliminá esaki.

Entrante 7 di novèmber 2025, Maduro & Curiel’s Bank ta inisiá un proseso fásil i sin gastu pa tur kliente ku tin un tarheta deteriorá.

E inisiativa aki ta konta pa tur kliente ku tin un tarheta di débito òf krédito personal i di negoshi ku a deteriorá. E proyekto di remplaso ku MCB Curaçao a start kune a wòrdu lansá luna pasa na MCB Bonaire. Den e siguiente fase di e proyekto, lo siguí ekspandé pa e otro islanan di MCB Group (Aruba i Sint Maarten).

Durante e lunanan benidero tur kliente ku ta deseá di remplasá nan tarheta di débito òf krédito, por hasi esaki hasiendo uso di un di e siguiente 3 métodonan simpel:

• Via MCB Mobile Banking App
• Via Contact Center
• Ku bishita personal na un Brènch

E kliente tin e opshon di skohe pa hasi entrega di tarheta na su adrès registrá na Banko òf pasa buska su tarheta na brènch. Kliente ku skohe pa buska e tarheta na brènch, ta risibí un email ku indikashon di fecha ku e por pasa buska su tarheta. E proseso di remplaso ta dura un máksimo di 2 siman.

Durante e proseso di remplaso, bo tarheta aktual ta keda aktivo, pues bo por sigui hasi bo transakshonnan bankario. Na momentu ku e kliente risibí e tarheta nobo i aktivá esaki, por fabor distruí i deshasí di e tarheta bieu.

Klientenan por remplasá nan tarhetanan deteriorá gratis te dia 28 di febrüari 2026. Na final di e periodo aki Banko ta evaluá si ta nesesario pa ekstendé esaki.

Pa mas informashon en konekshon ku remplaso di bo tarheta, por fabor tuma kontakto ku nos Contact Center na telefon: 466 1111 òf via email na: customer.support@mcb-bank.com, Whatsapp LEO na (599 9) 466 1111 òf LEO live chat via nos wèpsait: www.mcb-bank.com.

Ku e inisiativa aki MCB ta reafirmá su kompromiso pa sigui ofresé servisio bankario ku fasilidat i seguridat. Nos ta balorá e konfiansa di nos klientenan i ta sigui traha kontinuamente pa mehorá nos produkto i servisionan.

7 di novèmber 2025