MCB Prize 2025 pa dos íkono: Jean Francisca i Gilbert Martina

E kaminda históriko di Kòrsou pa Mundial: Un vishon di 25 aña

Willemstad – Markando e di 29 edishon, dia 18 di desèmber ’25, Presidente & CEO di MCB, Quinten Fraai, a entregá ku orguyo MCB Prize 2025 na Jean Francisca i na Gilbert Martina.

Kualifikashon di Kòrsou pa Mundial 2026 ta un momentu históriko i resultado di un vishon, di kompromiso i di patriotismo. E logro aki tin su raís den e vishon firme di Jean Francisca i a bira realidat bou di liderazgo di presidente aktual di FFK, Gilbert Martina.

Pa pone e éksito aki den konteksto, durante entrega di e premio MCB Prize 2025, Quinten Fraai a pone atenshon riba diferente aspekto importante di e trayektoria aki:

E trayekto aki a kuminsá na aña 2000, ora Jean Francisca, komo presidente di NAVU (Nederlands Antilliaanse Voetbal Unie), a introdusí su vishon pa algún día Antia Hulandes/Kòrsou partisipá na Mundial. Den e mesun aña ei a organisá Polar Cup, ku hungadónan ku desendensia di Kòrsou. For di kumienso, Maduro & Curiel’s Bank a duna su sosten ku a inisiá pa medio di un yamada direkto di defuntu Lio Capriles na Jean Francisca. E konfiansa aki a keda suprayá pa tantu e kalidat di e trabou di Jean ku e selekshon nashonal, komo e konfiansa di nos Banko den futuro di futbòl lokal.

Na aña 2010, NAVU a bira ofisialmente FFK (Federashon Futbòl Kòrsou) ku Jean Francisca komo presidente. E transishon aki a marka e kuminsamentu di un enfoke mas strukturá i dirigí pa realisá su vishon a largo plaso i a marka e komienso ofisial di “Rumbo pa Mundial”.

Komunidat di Kòrsou tambe a hunga un ròl krusial. Ku partidonan pa gran parti ‘sold-out’. Esaki a kontribuí grandemente na ingreso i desaroyo di e trayekto.

Komo ku Jean Francisca a enfatisá e importansia di entrenamentu profeshonal i semanal komo preparashon pa Mundial, FFK a enfoká riba futbolistanan profeshonal ku desendensia di Kòrsou, di kua hopi di nan tabata aktivo na Hulanda. E tim a benefisiá, entre otro di e eksperiensia di direktor tékniko Etienne Sillé i entrenadónan renombrá manera Patrick Kluivert i Remko Bicentini. A pesar di e retonan, e direkshon a keda kla i konsistente.

Na aprel di e aña aki, Gilbert Martina a inisiá su funshon komo presidente di FFK. Promé ku su nombramentu, ela sostené FFK pa kontratá bondscoach Dick Advocaat i su staf. Bou di liderazgo di Gilbert, na mei 2025 a lansa Kopa Kòrsou i na òktober kompetensianan di futbòl lokal a inisiá. Ku enfoke fuerte riba kualifikashon pa Mundial 2026, Gilbert a dediká su mes ku su forma di liderazgo i su relashonnan pa akselerá e proseso.

Na novèmber di e aña aki, e soño a bira realidat. Nos selekshon nashonal di Kòrsou a kualifiká ofisialmente pa Mundial 2026, bou di guia fuerte di bondscoach Dick Advocaat i su tim i liderazgo di presidente Gilbert Martina.

E logro aki ta históriko pa diferente motibu: E kualifikashon riba su mes, e atenshon mundial riba nos Dushi Kòrsou i nos kultura i e impakto positivo duradero ku esaki ta trese ku’né. Kòrsou ta e pais mas chikí, ku e poblashon mas chikí ku a yega di kualifiká pa Mundial di FIFA. Esaki a fortalesé nos sentido di patriotismo i unión no solamente na Kòrsou pero tambe na Aruba, Sint Maarten i islanan BES.

Na nos humilde opinion, no tin ningun otro inisiativa e aña aki ku un impakto asina fuerte, positivo i di nation-building pa Kòrsou.

Loke a kuminsá na aña 2000 komo e vishon di Jean Francisca i a bira realidat na 2025 bou di liderazgo di Gilbert Martina, a krese bira un di e logronan mas impaktante den historia di nos pais.

P’e motibunan aki i komo rekonosementu pa nan esfuerso i liderazgo eksepshonal, ku plaser nos ta honra Jean Francisca i Gilbert Martina, huntu ku nan timnan na FFK, ku MCB Prize 2025.

Pabien di kurason na ambos lider. Mientras ku nan por a konta riba timnan fuerte i dediká, nan meresé e distinshon pa guia Kòrsou na e momentu históriko aki.

Riba potrèt: Remco Meulens (Miembro di gerensia di MCB), Migdarys Mercera (Manager Community Relations), Quinten Fraai (Presidente & CEO MCB), Gilbert Martina (Ganadó MCB Prize 202)5, Jean Francisca (Ganadó MCB Prize 2025), Daniela Cohen-Henriquez (Miembro di gerensia di MCB), Caroline Sluis-Gibbs (Manager Marketing & Communications).