MCB komo partner prinsipal pa ‘Kana den union i alegría pa un bon kousa

Willemstad – 15 di aprel 2024; Durante un konferensia di prensa, a presentá un kolaborashon úniko entre Ronald McDonald House Charities Curaçao, Children’s Museum Curaçao i Prinses Wilhelmina Fonds Curaçao bou di e nòmber: Fundashon Strides for Smiles. E inisiativa aki ta sostené pa partner prinsipal Maduro & Curiel’s Bank.

E organisashonnan aki a uni forsa ku e mishon komun pa enfoká riba bienestar di mucha, sigurá akseso na servisionan di kalidat, duna apoyo na famianan, promové aksesibilidat, inbolukrá i krea un impakto mas grandi den nos komunidat.

E promé evento di Fundraising di Strides for Smiles ku Maduro & Curiel’s Bank komo partner, ta tuma lugá djadumingu día 2 di yüni ‘24. E ta enserá un Paseo Familiar di 5KM pa henter famia, yená ku ambiente. E kaminata ta pa partisipante di tur edat den kual e ruta ta un aventura i ta trese un sonrisa riba bo kara. E evento aki lo ta hopi mas ku solamente algu bon pa salú. Danki tambe na kolaborashon di e “Experience Partners”, ku ta hasi e kaminata un aventura mientras ta kana. Laga bo soñonan bira realidat na ‘DREAM STREET’ i bira bo propio obra di arte na ‘PAINT LANE’. Bo ta bai kas ku rekuerdo sigur!

Strides for Smiles ku su partner prinsipál MCB lo traha ku diferente inisiativa pa sigurá ku mas tantu famia posibel por partisipá na e evento “fun”aki.

Na okashon di e Konferensia di Prensa, representantenan di Fundashon Strides for Smiles, Maduro & Curiel’s Bank, FDDK i Foundation Tri-Curaçao a hiba palabra. E ‘experience partners’ a splika e toke di ambiente i aventura ku nan lo duna durante e kaminata.

No pèrdè e evento úniko aki. Laga nos kana huntu pa un futuro mihó pa nos muchanan i famianan, un sonrisa ku kada stap!

Pa mas informashon i partisipashon, por fabor sigui medionan di komunikashon òf bishitá: www.stridesforsmiles.com. E potrètnan ta papia pa nan mes.